• ×
الإثنين 17 محرم 1441 | 1441-01-16
عبدالله البطيان

حكايا البطيان سوالف ومثلها أمثال

عبدالله البطيان

 0  0  412
عبدالله البطيان
بقلم/ عبدالله البطيان





دريتوا بسالفة القوبعه؟
أكيد يا جيل هالايام ما تعرفونها
اييييه القوبعه وما ادراكم...
شنهي القوبعه أول نعلمكم اياها حسب فهمي من سمعت عمي صالح يقولها لأني والله ماشفتها ولا أعرفها وماصادف مرت عليه مول...
القوبعه حسب فهمي أنها حيوان زاحف سريع الحركه يبيض ويفرخ وشديد الملاحظة والنباهه عشان ما تنصاد.
تعيش بالنخيل والفلاحين يعرفونها أكيد بس يمكن من مكان لمكان لها أسم ثاني...
المهم يا قراء سالفتي وحگايتي اللطيفة الظريفة الحفيفه النحيفه بعد بسم الله والصلاة والسلام على رسول الله واله وصحبه ومن والاه ومن تبعهم على الحق وعن الصف ما انشق وما خاب من بابهم طق الله يبعدكم عن البق والنق..
الذيب كان جايع ويلف يدور له فريسه منا مناك قولب النخل عفس أم المكان ولا حصل شي وراح يدور حول الجت واشراب الجت ما يحتاج عاد لمن يكون شارب ماي عدل ومسقي الشرب ويجي طوله ذراع وشوي...
والذيب جاي يتمشى بين الجت يتبرد ويشوف منا مناك شي بين الجت شي ما شيات والجوع لاته لت وجايب خبره وهبابه يقولب بعيونه ويتشمم ويشوف منا ومناك...
وهو يلف المكان ويشوف القوبعه وهو يمشي ووقف طاقه عقر بقر ومستن وقف حابس انفاسه شال حركته وفاهم ان القوبعه الحين بتختفي اذا حست فيه وبتشرد ومافيه قوه يلحق وراها الوضع واصل حده...
الحاصل تخوت تخوت وبكل استكانه وثبات طبق على القوبعه والظاهر كانت بحاله موطبيعيه قبل يطبقها الذيب والذيب كيّف ومبسوط لإنجاز يعتبر شي فضيع انه صادها ويبي يحتفل بهالجو قام يغني وهو ماسكها بثمه وشاص عليها ويقول :
يالقويبعه يالقويبه
صدناش صدناش
وهو شاص عليها وخنقها عدل مالها منفس نحشه كلش يا سلام بيفصفصها ويسد جوعه بس مكافئ نفسه ومحتله ابوزعم...
انزين...
القوبعه مثل ما عدوا انها نبهه وفطنه وذكيه وتحاول الحين تتملص من هالموقف وتدور المخراج وحالتها حاله...
جات وقالت للذيب
بالله عليك ليش كذا
قال لها الذيب علامش شصاير بعد
قالت له شلون تعايب عليه وتقول يالقويبعه يالقويبه
مب عدله عليك صراحه
قالها ليش يعني
قالت له الحين أنا اسميك يابومحمد وأنت تسميني يالقويبعه صراحه ما يصلح كذا...
قال لها ش المطلوب يعني عشان يصير عدل في وجهة نظرش الحين شسميش الحين
قالت له سمني بسمي وقل يا القوبعه بس هذا اللي ابي مثل ما انا احترمك واسميك يابومحمد قل لي يالقوبعه شبيضرك الحين.
القوبعه حطت الذيب بزاوية وخذته بالحميه وجلست تزن عليه لين فكت مخه بعد ما تكتكت علىه وحسبتها صح وشافت ان فكرتها بتجيب في الذيب موقف ولا احلى
وفعلا قام الذيب وتهجا وهو مقبض عليها بثمه وقام يقول بتهجئة اسمها وتصوروا يا قراء يا كرام كيف نطق الاسم هذا..
والكل يجرب ويشوف ومن الحقيقه يحوف وبدون أي محلوف تعالوا معاي والتجربة خير برهان
خلكم معاي مركزين من قام وقال يالقووووباااعاااه.. من فتح ثمه بالباااعااا انحاشت وسوت في حضرت الذيب فلم مرتب بهروب تكتيكي من فكي الذيب ههههه وبين ذكاء القوبعة وبقارة الذيب...



 0  0
التعليقات ( 0 )
أكثر

جديد الأخبار

يرأس وزير الشؤون الإسلامية والدعوة والإرشاد الشيخ الدكتور عبداللطيف بن عبدالعزيز آل الشيخ، وفد المملكة في أعمال المؤتمر الدوري الثلاثين للمجلس..

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

كل مافي هذه الصحيفة خدمة لكم ،، ونسعى للأفضل ،، وجميع الحقوق محفوظة لأصحابها