• ×
الأحد 20 ربيع الأول 1441 | 1441-03-19

حكايا البطيان سوالف ومثلها أمثال

حكايا البطيان سوالف ومثلها أمثال
جده . نشر . زكية القرشي 


حتى تصلون على محمد وآل محمد وعلى صحبه ومن والاه الى يوم الدين، اعلمكم هالمرويه اللي قالها لنا عمي صالح ابو عدنان في آخر لمة عايلة ويتكلم عن سوالفنا كشباب ان احنا نسوي الشي ونبي نتيجته بسرعه بدون صبر ولا تروي...

الشاهد قال هالسالفه اللي بقولها بطريقتي عشان ما ادخل بذمتي شي، وطبيعي السوالف تتشابه والمواقف تتآلف وتنجمع القلوب على الخير وتتنبه الأذهان للحكمة ومبتغاها وهذا الشي مطلب للمؤمن وعلى سبيل الذكر نذكر مضمون حديث الرسول صل الله عليه وآله وسلم حين قال : الحكمة ضالة المؤمن أنَّ وجدها فهو أولى بها.

القصة تقول :
هذا شيخ النخالوه (كبير الملاك لمزارع الفلاحة) كان مار من بستان وفيه شايب جالس يسقي الفسيلة (الفسيلة ابنة النخلة) ويرتبها ويزبطها ومهتم فيها ولاحظ الاهتمام الكبير اللي يقوم فيه الشايب تجاه الفسيلة..

المراد ان شيخ النخالوه ضحكت وأخذ جوه ولفت انتباه النخلاوي الشايب وقال له يا شيخ النخالوه علامك تضحك؟

عسى فيه شي ونسك الله يضحك سرك وجعله دوم علمني ش اللي شفته وضحكك؟

قال شيخ النخاوله : أنت هالحين على هالاهتمام والشغل ودوزنتك وتروسيتك ذي بسئلك الحين كم عمرك؟

قال له النخلاوي : حروة الثمانين طال عمرك ليش؟
قال شيخ النخاولة : أنت الحين تترجه تاكل من هالفسيلة على هالعناية والاهتمام وتلاحظها عدل؟
قال النخلاوي : لا، بس زرعوا وكلنا ونزرع وياكلون!...

شيخ النخالوه بدا الكلام يدق فراسه وجلس حروة لحظات صفن يفكر في كلام هالشايب وقال له : لا بالله انك عدل وآنه الغلطان لكن دريت هاك تفضل..

وأخذ من جيبة صرة فلوس يجي له حزمة فيها شي وشويات وقال له هذا مكافئة لك لحكمتك.

قام الشايب وضحك وبالغ في الضحك تالي قال الحمد لله الشكر لله عطية من عطايا ربي الله يمن علي واصرفهم في طاعته وتكون وسيله للنجاة والدخول لجنته...

شيخ النخالوه قاله :علامك ضحكت من عطيتك الفلوس شلي عندك يا حجي ش السالفة؟

قال له النخلاوي : كنت تقول لي هل تترجه منها شي وجاوبتك وهذا سبحان الله جواب الله سريع هذا حصدت منها وبسببها كل هالفلوس بشكل ما تصورته فضحكت على كلامك.

قام شيخ النخالوه انعجب في حكمة الشايب ومد له صره ثانية وقال له هذا مني لك عش وعطنا من هالحكم صراحة فتحت مخي.

المهم الشايب شرى له كم قطعة أراضي زراعية وأعلن في مسجد الحارة الاعلان التالي :

اي واحد من المومنين عاطل ولا محتاج يگاري ( يعني يعمل) ووقته مناسب من بكره الفجر بعد الصلاة اتناكم عند جدار مقبرة الخدود.

وقام وشغل شباب الحارة وغرس ذيك الفسيل وحطها وقف لله وثمرها للأيتام والفقراء والمساكين والمحتاجين وحفر فيها ذيك العين اللي تسقيها وصارت جنة فيها المشمون والترنج واللومي والتوث الاحمر والابيض وغرس فيها كم سدره وبوبي وعنب وكل فاكهة الحسا فيها وعاشوا الناس في سبات ونبات وصارت المزارع تغذي الناس سنين ومنين كله بفضل ذاك الموقف.

الآن هالقطع خذتها البلديه وقطعت منها وصارت شوارع والشوارع صارت واجهاتها محلات ومحطة بانزين ومنطقة توزعت سكنيه وسكنت العالم ومن وقتها قالوا ان هالاماكن مغصوبه من راعيها وانها ملك للمسلمين لانها وقف وصارا الناس في اشكال الي قال هذا الحكومة رتبت لكم المكان ورجعت بالنفع عليكم كواجهة حضاريه، واللي قال لا انباقت الاراضي ولل في من يستفيد منها شاهدنا الموضوع صار حگي في حلوج العالم.

تمت
عبدالله البطيان
الأربعاء ١٩ ديسمبر ٢٠١٩م
١٢ ربيع الآخر ١٤٤٠هـ
بواسطة :
 0  0  1166
التعليقات ( 0 )
أكثر

جديد الأخبار

أعلن المستشار بالديوان الملكي المشرف العام على مركز الملك سلمان للإغاثة والأعمال الإنسانية رئيس الفريق الطبي والجراحي في عمليات فصل التوائم السيامي..

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

كل مافي هذه الصحيفة خدمة لكم ،، ونسعى للأفضل ،، وجميع الحقوق محفوظة لأصحابها